Паян Шупашкарти Пролетари урамӗнчи 16-мӗш ҫуртӑн 1-мӗш корпусӗнче 15 ҫулти каччӑ пурнӑҫӗ татӑлнӑ. Вӑл ҫӳллӗшӗнчен ӳкнӗ.
Каччӑ медицина учрежденийӗ тӑррине персе аннӑ. Йывӑр сурансене пула вӑл ҫавӑнтах вилнӗ.
Следстви комитечӗ, йӗрке хуралҫисем халӗ ӗҫ-пуҫа уҫӑмлатаҫҫӗ.<s></s>
Ҫӗнӗ Шупашкарти 4-мӗш шкулта нумай ача апатпа наркӑмӑшланнӑ. Пульницӑна пулӑшу ыйтма 20 ҫын пынӑ, вӗсенчен 19-шӗ – ачасем.
Виҫҫӗшне инфекци уйрӑмне вырттарнӑ. Ыттисене медпулӑшу панӑ хыҫҫӑн киле сипленме янӑ. Пульницӑна пынӑ пӗтӗм ҫыннӑн пӗр пек чир паллисем пулнӑ: вӗсем апатпа ҫыхӑннӑ.
Прокуратура тата Следстви комитечӗн Чӑваш Енри Следстви управленийӗ тӗрӗслев пуҫарнӑ. Ҫакӑ паллӑ: ҫак шкулта апатланӑва йӗркелекенни – Шупашкарти 2-мӗш ҫӑкӑр савучӗ.
Канаш хулинче Красноармейски урамӗнчи пӗр ҫуртра халӗ те ӑшӑ ҫук. Унта пурӑнакансем электрохатӗрсемпе ӑшӑнаҫҫӗ.
Мӗншӗн ӑшӑ халӗ те ҫук? Ку ҫивӗч ыйту пирки Чӑваш Ен Элтеперӗ Олег Николаев та пӗлет.
РФ Следстви комитечӗн Чӑваш Енри следстви органӗсем Канаш хулин администрацийӗ служба тивӗҫӗсене кирлӗ пек пурнӑҫламан тесе пуҫиле ӗҫ пуҫарнӑ. Халӗ следстви пырать.
Паян Шупашкарта кӳлмекре хӗрарӑм виллине тупнӑ. Кун пирки 14 сехет те 20 минутра хыпарланӑ.
Халӑх корреспонденчӗ «Про Город» хаҫата пӗлтернӗ тӑрӑх, хӗрарӑм кӳлмек урлӑ выртакан кӗпертен ӳкнӗ. Вырӑна ятарлӑ службӑсем ҫитнӗ. Шел те, хӗрарӑм вилнӗ.
Следстви комитечӗн Чӑваш Енри управленийӗн ӗҫченӗсем ӗҫ-пуҫа уҫӑмлатаҫҫӗ.
Паян Ҫӗнӗ Шупашкарта нумай хваттерлӗ ҫурт ҫывӑхӗнче арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Инкек Тӗкӗрҫ тӑкӑрлӑкӗнчи 3-мӗш ҫурт патӗнче 13 сехет ҫурӑра пулнӑ. Ҫакна курнӑ ҫынсем каланӑ тӑрӑх, арҫын 4-мӗш хутран вӗренпе анма тӑнӑ та аялалла персе аннӑ.
Халӗ Следстви комитечӗн Чӑваш Енри следстви органӗсем тӗрӗслев ирттереҫҫӗ.
Шупашкарта ака уйӑхӗн 12-мӗшӗнче кӑнтӑрла 9 ҫулти арҫын ачана вӗлернӗ. РФ Следстви комитечӗн Чӑваш Енри следстви органӗсем кун тӗлӗшпе пуҫиле ӗҫ пуҫарнӑ.
Следстви ачана кукамӑшӗ пӑвса вӗлернӗ тесе шутлать. Верси ҫакнашкалтарах: кукамӑшӗпе мӑнукӗ хваттерте пулнӑ (унта ача, унӑн амӑшӗ тата кукамӑшӗ пурӑннӑ). 61 ҫулти кукамӑшӗ тахӑш самантра мӑнукне пӑвса вӗлернӗ. Кун хыҫҫӑн вӑл килтен тухса кайнӑ. Ӑна полицейскисем дачӑра тытса чарнӑ. Амӑшӗ ӗҫрен таврӑнсан ача виллине тупнӑ.
Мӑнукне мӗншӗн вӗлернӗ? Следстви ҫакна уҫӑмлатать. Малтанлӑха пӗлтернӗ тӑрӑх, хӗрарӑма ача хӑйне мӗнле тытни килӗшмен.
Следстви суда хӗрарӑма следстви вӑхӑтӗнче хупма ыйтса тавӑҫ тӑратнӑ.
Следстви комитечӗн Ҫӗмӗрлери районсен хушшинчи уйрӑмӗн ӗҫченӗсем пушарта нимсӗр юлнӑ нумай ачаллӑ ҫемьене пулӑшнӑ. Вӗсем укҫа-тенкӗ, тумтир, усӑ курма кирлӗ япаласем пухнӑ та ҫемьене пырса панӑ.
Улатӑр тӑрӑхӗнчи Алтышево ялӗнче пурӑнакан 3 ачаллӑ ҫемье нарӑсӑн 26-мӗшӗнче ҫуртсӑр юлнӑ. Пушар ӑна тӗппипех тӗп тунӑ. Инкекре никам та шар курман. Анчах ҫемьен халӗ тӑванӗсем патӗнче пурӑнма тивет.
Нумай ача амӑшӗ Следстви комитечӗн ӗҫченӗсене тав сӑмахӗ каланӑ.
Канаш хулинче тӳнсе кайнӑ автокран рабочие суранлатнӑ. Следстви ку тӗслӗх тӗлӗшпе пуҫиле ӗҫ пуҫарнӑ.
Ку пӑтӑрмах пӗлтӗр чӳк уйӑхӗн 18-мӗшӗнче тимӗр-тӑмӑртан япаласем туса кӑларакан предприятире пулнӑ. Кран ӗҫленӗ чухне тӳнсе кайнӑ, вӑл йӑтма пуҫланӑ тимӗр листа предприяти водителӗ ҫине ӳкнӗ. Ҫапла ку унӑн сывлӑхне йывӑр сиен кӳнӗ.
Халӗ следовтельсем ӗҫ-пуҫа уҫӑмлатаҫҫӗ.
Ӗнер, раштав уйӑхӗн 21-мӗшӗнче, каҫхине Шупашкарта «Солнечный» микрорайонти Хӗвеллӗ урамӗнчи 16 хутлӑ 8-мӗш ҫурт ҫывӑхӗнче хӗр виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.
Хӗр ҫӳллӗшӗнчен, 8-мӗш хутран, ӳкнӗ. Вӑл тӳрех вилнӗ. Халӗ РФ Следстви комитечӗн Чӑваш Енри следстви органӗсем ӗҫ-пуҫа тӗпчеҫҫӗ.
Ӗнер ирхине ЧР транспорт министрӗ пулнӑ Владимир Осипова тытса чарнӑ. Ун патне пакунлисем Атӑл леш енчи ҫуртне пынӑ.
Владимир Осипова Следстви комитетне илсе ҫитернӗ. Ӑна должноҫпе усӑ курнӑшӑн, преступлени ушкӑнӗ йӗркеленӗшӗн, тӳлев укҫине саккунсӑр ҫаврӑнӑша янӑшӑн айӑпласшӑн.
Ыйтса тӗпченӗ чухне экс-министр айӑпне йышӑннӑ, преступлени ушкӑнӗнчи ытти ҫын пирки те каласа кӑтартнӑ.
-8.7 °C